كله فى الكلتش....

طبيعى ان الواحد ينقى اصحابه و انهم يكونوا تفكيرهم واهتمامتهم قريبه من بعض و طبعا ميكنش فيه فرق اجتماعى شاسع بينهم عشان .....
بس هل طبيعى كمان ان الدكتور ينقى مرضاه و انهم يكونوا من نفس الطبقه الاجتماعيه اللى هو منها و على اساس كده هتكون شكل معاملته معاهم.. انا شخصيا الموضوع ده مليش راى فيه والموضوع معقد مش بالبساطه اللى قد يبدو عليها.. بس انا هحكى اللى حصل من وجهه نظر" اللى عملوا كده" و برضه من و جهة نظر" حد بيبص عالموضوع من بعيد".. الاول خلينا فى الحد اللى بيبص من بعيد واللى هوا انا "

من كذا يوم كده و انا واقف فى الطوارئ دخل علينا ناس شكلهم و هيئتهم غير الناس اللى احنا متعودين عليهم فى استقبال القصر العينى"" اكبر مستشفى مجانى فى مصر" وده طبعا بيحكم نوع العيانين اللى بيدخلوا فيها اللى هما افقر ناس,, الناس الغلابه قوى ,يعنى من الاخر كده عمال و فلاحين و عاطلين و محتارين و محتاسين و.... ما علينا
حتى الموظفين الغلابه مبيجوش عندنا لان بيكون لهم تامين صحى فبيروحوا مستشفيات التامين,, المهم دخل ناس شكلهم "نضيف" مع تحفظى على هذه الكلمه بس كل الناس مانت بتقول كده" ايه اللى خاب الناس النضاف دول هنا" المهم دخلوا مع عيان و كانو متحولين من مستشفى خاصه عشان يدخل رعاية الحالات الحرجه بتاعت قصر العينى,, واللى على ما اعتقد من احسن اوهى فعلا احسن و انضف رعايه فى مصر,,و طبعا انضف مكان فى قصر العينى
المهم العيان مغيبش كتير خمس دقايق و مات و هو فى _اودة الاسعافات ,, اللى مش عادى بقه و لفت نظرى ان احنا متعودين ان فيه ناس كتير بتموت فى الطوارئ
" مش مهم هات اللى بعده" ده لسان حال الكل من امن و تمريض و عمال و حتى الدكاتره .. دايما فى الطوارئ شخط و نطر فى اهل العيانين" ممنوع الوقوف هنا .. وانتا يا استاذ رايح فين.. وواحد بس مع العيان و الباقى بره" و حتى لما حد بيموت اهم حاجه بتكون ازاى يتخلصوا منه بسرعه عشان يستقبلوا حالات جديده و اكتر حاجه بتتقال لاهل العيان "البقاء لله ابوك مات",, "بس مش مهم" المهم بقه انك تلحق نفسك بسرعه و متضيعش وقت و روح خلص اجراءاته بسرعه و خرجه من هنا قبل ميتحول عالمشرحه _متخافوش محدش بتحول عالمشرحه ولا حاجه_ هوا احنا عارفين ناخد بالنا من الصاحيين اما هنجيب ناس يشرحو الميتين,, المهم كلمتين التهويش دول بيتقالوا عشان اهل العيان ينجزوا و ميندمجوش فى دور الحزن و العياط و اللطم عليه او على الاقل ياجلوه بعيد عن دماغنا
اللى لفت نظرى قوى المره دى.. ان الراجل اللى مات " قريب الناس ولاد الناس" ,, لما مات كل الناس راحت تواسيهم و يطبطبوا على اهلهم و ناس كتير من زمايلنا سابو اللى فى ايدهم وراحوا قعدوا جنب اهل الراجل اللى مات بيواسوهم و يصبروهم طب اشمعنا دول _عشان نضاف _يعنى ,و عشان بينتموا لنفس الطبقه الاجتماعيه لابسين زيينا و بيتكلموا زيينا و يمكن احسن كمان بنى ادمين يعنى..بنى ادمين قوى كمان..
مش زى الناس التانيين "الياي" دول اللى مش لذاذ خالص,, الغلابه قوى قوى دول و بيجوا لابسين بزرميطه فى لغبطيطه و بيتكلموا حكشه...
دى كانت وجهة نظر اى حد ممكن يبص للموضوع نم بعيد او بره
بس برضه الناس اللى هما عمال و فلاحين دول" الغلابه قوى قوى"مش سهل التعامل معاهم و لا سهل انك تتفاعل معاهم و لا انك تفهمهم و هما يفهموك بسرعه , حكاية الاميه دى فعلا "بلوا" و فارقه معاهم قوى فى مستوى و طريقه استيعابهم و المشكله ان ما فيش وقت و العيانين بالهبل و لو هنعاملهم "توتى فروتى " كده يبقى مش هنخلص منهم سواء اسئله مبتخلصش و ساعات طولة لسان واحيانا قلة ادب و ساعات تانيه تريقه,,كل الكلام ده انا بقوله عن تجربه شخصيه انا فاكر مره كنت قاعد و دخل عيان فا قلت له اتفضل اقعد و قمت كشفت عليه و بقوله انت بتشتكى من ايه.. قاللى " انتا مين"
قلت له انا الدكتور يا باشا ده لو سيادتك معندكش مانع طبعا..قال لى بص يا اخويا انا عندى.....
شويه وواحد زميلى دخل و لقى اكتر من عيان فى اودة الكشف شخط فى كل الموجودين.. بمعنى اصح "فشخهم"
فقام جاى و بيقول لى العيان ده عنده ايه يا احمد قلت له , قول للدكتور على شكوتك يا حبيبى
قال له حضرتك انا قمت من النوم ...و بعدين سيادتك جالى مغص.. معاليك بقه لما المغص جالى شويه كده و اسهلت
ما انتا بتعرف حضرتك و معاليك و بتعرف تتكلم بذوق اهوه, مش كنت اخوك من شويه!!
بجد و بدون حزازيات حاجه تقرف و ناس مبتجيش غير بالعين الحمرا,, ومثل هذه الثقافه منتشره قوى عند الطبقه الغلابه و الغير متعلمين " اللى يزعق هو اهم واحد" مقدرش انكر ان فيه ناس تديهم ذوق يدوك احترام و ادب,بس للاسف دول قلوا قوي,

فى الاخر انا مش عارف ايه الصح و ايه الغلط, بس اكيد مفيش حاجه صح قوى و مفيش حاجه غلط قوي و تبقى دائما الحكمه الغامضه و الخالده " كله فى الكلتش"