سهران لوحدى انا و القمر و النجوم بلليل
و الوحده صعبه قوى و الليل ممل و طويل
و الوحده مش وحدة مكان بسيط و ضئيل
او زمان ضايع مفيهوش ونس وخليل
دى الوحده جوه النفس عذاب وويل
الوحده جواك تمحى الدفا و تشيل
صفا الروح و النفس وكل جميل
وتجيب مكانهم من السواد والهم سيل
فى قلب عمره من البراءه كام يوم قليل
عنده الامان مجرد حلم قديم من غير دليل
والامانى وهم ,وكتير الوهم بيكون اهم بديل
الوهم اجدى من الحقيقه, بسيط قوى و جميل
مفيهوش صعب ومستحيل ولا تعقيد ولا تسهيل
ريح دماغك واقفل جفونك وشيل الهم شيل
واسرح فى الفضا بالخيال و مع النجوم حلق وطير
عند السحاب وجنب القمر نسمة هوا واحلى عبير
والندا فوق البنفسج جمال وبهجه واضحه قوى وكتير
ساعتها,
افرد جناحك هناك
وسيب الندا يعيش جواك
وشم النسيم حواليك ومن براك
وحس روحك صافيه كمان وياك
انسى الهموم و خليها كمان تنساك
احمد حسام
