كلنا تامر

لما تبقى بلد فيها حكومه " نظيفه" بالشكل ده, و مجلس شعب يغلب عليه "الوطنيه" بالشكل العجيب ده, والباقى "بالاخويه" دى, ووزارة داخليه شعارها " العدل" ى . واعلام كان لاكتر من عشرين سنه بمعنى الكلمه الاعلام" الشريف" و جرنان زى الاهرام كان فعلا " نافع" جدا , وشعب بالعظمه دى بيبان فعلا فى وقت الشده و يقول كلمته " كلنا تامر"
محدش بقى يستغرب او يسئل هى ليه البلد دى ترتيبها ال 144بين دول العالم والمهم انه الدول اللى ورانا و يا حسرتاه هما شوية الدول الافريقيه ولمامة اسيا, حاجه تحسر فعلا
المهم خلينا فى الموضوع,,, يعنى ايام فترة الازمه اياها بتاعة الفنان تامرحسنى لما كنت افتح التلفزيون و الاقى بنت من التافهين اياهم بتعيط و تقول ان تامر مظلوم و انه الحق هيبان ,, ولا قنوات الفيديو كليب اياها ,, حالة استنكار و استنفار بمعنى الكلمه ازاى الفنان توتى الرقيق فى السجن ملايين ال" اس ام اسيز" من عاشقة تامر و مجنونة تامر و .. ... تامر
المهم كنت بقول عادى يعنى دى بنات دماغها مفسى , و باذن الله ربنا اكيد هيرزقهم على قد دماغهم و جنانهم,,
اللى بجد نرفزنى مره وانا على كوبرى اكتوبر لاقيت عربيه فى بوستر على ضهرها مكتوب عليه " كلنا معاك يا تامر" قلت اكيد بنت من البنات اياهم اللى من بره موز و لوز ومن جوه تفاهه و عبط , المهم الصدمه كانت لما لاقتي العربيه دى اللى سايقها حد المفروض انه راجل, شاب يعنى, قلت ااه يا بلد ,, و رحت بحكى لواحد صحبى , قالى يا بنى عادى انا لسه شايف امبارح واحد كاتب على عربيته " كلنا تامر" وهنا مقدرتش امسك نفسى انى اقول الكلمه اياها ام تلت حروف و واالى بتتقال فى المواقف اللى زى دى, اللى البعض بيعتبرها كلمه قبيحه,
"كلنا تامر" يا نهار اوسد قصدى اسود ,, ليه يعنى وبامارة ايه,, هى البلد خلاص معدش فيها رجاله ولا اخلاق و لا حتى حبة خجل وخشى,, للدرجه دى الادمغه بايظه ومفسيه,, ايه الجرأه و البجاحه والسطحيه دى يا جدعان,, طب محاولش يفكر ابن اللذينا ده فى معنى الكلمه اللى هوا كاتبها دى ,كلنا تامر وتامر ده موزور يعنى كلنا مزورين, محاولش يفكر انه بوستر ذى ده لوحده ممكن ياخد فيه ثلاث سنين سجن زى الخمسه اللى خدهم حبيبه تامر,, ده اعتراف ضمنى منه انه مزور,, قال كلنا تامر قال,,
وتحت طبعا الضغط الشديد من جماهير مصر الوفيه اللى متخلتش عن الفنان الراقى فى محنته,, بالمناسبه يعنى ايه فنان و يعنى ايه كمان راقى؟ , فنان دى كان واحد صاحبى زمان قالى انها كلمه فارسى او حاجه كده عجيبه و ان معناها حمار, انا طبعا مصدقتوش وقتها و قلت ده اكيد بيهرك ,, بس الصراحه فى ايام ذى دى ومع انتشار الحمير قصدى الفنانين بالشكل ده,, انا ابتديت اقتنع بكلام صاحبى ,,, المهم و تحت الضغط الشديد اصدر الحاكم العسكرى امر بالعفو عن الفنان لانه برئ وعمل كده من غير ميعرف انه غلط
يا حرام,,و انا اللى ظلمته و كنت فاكر ان بابا و ماما زى ماعلموه و هو بيبى انه يشرب و ياكل و يروح الحمام,, كنت فاكرهم برضه قالوا له ,, انه التزوير ده حرام او مش مهم حرام انه غلط,, مش مهم غلط ,, انه جريمه بيعاقب عليها قانون العقوبات رقم عشروميت الف لسنة احو ميه و عشرين
وخرج تامر من السجن خروج الابطال الصامدين وادى حته جايبها من موقع من اياهم من بتوع "هبل" تامر
هذا وقد اعد زملاؤه في السجن حفلا له بمجرد الإبلاغ عن خروجهوغنى تامر حسنى في الحفل 3 أغنيات، فيما اعد محبي تامر حسنى وعدد من فتيات الطبقة الراقية احتفالا خاصا لاستقبال تامر على بوابة السجن حيث قاموا بالاتصال ببعضهم البعض واتفقوا على التجمع للانطلاق بسياراتهم ليكونوا في استقباله ويقضون معه عدة ساعات ليخففوا عنه آلام السجن.

طبعا لازم يخطر على بالى دلوقتى سواق المكروباص العظيم اياه, فيلسوف و الله , هى دى الناس اللى بتفهم و لا بلاش,,, معلق برضه بوستر فى ضهر المكروباص,, بس كاتب عليه " و الله ما حد فاهم حاجه" ,, عديت الطريق بسرعه و جريت ورا المكروباص عشان ابوس ايده و اعبره له عن اعجابى,, كان هيدوسنى هوا كمان و قالى " اوعى وشك يا برنس

احمد حسام الدين